КИЧИК ЎТ ЎРГИЧ АГРЕГАТИНИНГ ИШЧИ ТЕЗЛИГИ ВА ҚАМРАШ КЕНГЛИГИНИ АСОСЛАШ

Чорва ҳайвонларининг асосий қисми деҳқон хўжаликлари ва аҳоли хонадонларида боқилади. Улар ҳайвонлар учун зарур бўлган маккажўхори, беда каби озиқа экинларини ўзларининг 0,5–3 гектар атрофидаги ер майдонларида етиштирадилар.
Бундай кичик майдонлардаги технологик операциялар, айниқса, ҳосилни ўриш қўл кучи ёрдамида амалга оширилади. Чунки анъанавий ўт ўриш агрегатлари кичик далада сифатсиз ишлайди, ҳосилни шикастлайди ва ёнилғини кўп сарфлайди. Натижада сарф-харажатлар ошиб, деҳқонга молиявий зарар етади. Агар кичик далаларда кичик ўт ўриш агрегатлари қўлланилса, бундай салбий ҳолатлар юзага келмайди. Бунинг учун кичик агрегатларнинг ишчи параметрларини асослашдек долзарб масалани ечиш талаб этилади. ТТZ-30C кичик трактор ва КОС-2,1 кичик ўт ўргичдан ташкил топган кичик ўт ўргич агрегатининг рационал ишчи тезлиги ва қамраш кенглигини асослашда тракторлар динамикаси ва машина-трактор агрегатларини тузиш фанларининг методологияларидан (қувват балансини ҳисоблаш, агрегатнинг тортишга қаршилигини аниқлаш) фойдаланилди. Тракторнинг қувват балансини тадқиқ қилиш натижасида унинг илмоғидаги қуввати ва ўт ўргич машинасининг тортишга қаршилигининг сон қийматлари (0,4 kW ва 1,195 kN) топилди. Бу қийматларга 2,1 m га тенг қамраш кенглиги ва 12,23 km/h рационал ишчи тезлиги тўғри келади. Таркиби ТТZ-30C ва КОС-2,1 бўлган кичик ўт ўргич агрегатини деҳқон ва томорқа хўжаликларининг кичик ер майдонларида ишлатиш тавсия этилади. Мазкур тадқиқотда келтирилган методологиялардан бошқа турдаги техника воситаларининг параметрларини асослашда фойдаланиш мумкин.