ЭЛЕКТР ТАЪМИНОТИ ТИЗИМИ ТОК ЎЗГАРТКИЧЛАРИ ИМКОНИЯТЛАРИНИ КЕНГАЙТИРИШ

Ушбу мақолада электр таъминоти тизимидаги ток ўзгарткичлар хусусиятлари, бирламчи токларни иккиламчи чиқиш катталикларига ўзгартириш усуллари тадқиқ қилинган. Шу билан бирга, ток ўзгарткичлар асосида асинхрон моторларда фаза йўқолишлари ахборотини олиш схемалари тадқиқ этилган. Бирламчи токлар сигналини олишда оптик толали ток датчиклари, Холл эффектига асосланган магнитогальваник ток ўзгарткичлар, электромеханик ўзгарткичлар, ток трансформаторлари ва ўлчов чулғамли ток ўзгарткичлар ўрганилди.
Мавжуд ток ўзгарткичларда бирламчи токларни ўзгартиришда асинхрон моторларнинг магнит тизимидан фойдаланиш имконияти бўлмаган.
Бунинг натижасида сигнал ўзгартиришнинг соддалиги, тезкорлиги ва аниқлиги каби талаблар бажарилмаган. Электр таъминоти тизимида электр катталикларни ўлчаш ва назорат қилишда ўзгарткичларнинг сигнал хатолиги 0,1…0,5 %дан ошмаслиги белгиловчи омил қилиб олинган.
Таҳлил ва солиштиришлар натижасида электр таъминоти тизимларининг электр қурилмаларини назорат қилиш ва ҳимоялашда электр автоматика элементлари ва қурилмалари аниқлиги жуда юқори бўлишининг талаби бўйича янги турдаги ток ўзгарткич ишлаб чиқилди. Асинхрон моторларда фаза йўқолишини аниқлаш учун статор пазларига ўлчов чулғамлари жойлаштирилди. Ўрамлар сонини 1-2 та қилиб танлаш назорат ва ҳимоя тизимлари учун меъёрланган катталикни (5 V) таъминлади.