КУЗГИ ЮМШОҚ БУҒДОЙНИНГ ЯНГИ МАҲАЛЛИЙ ТИЗМАЛАРИДА МАҲСУЛДОРЛИК ВА ДОН СИФАТИ КЎРСАТКИЧЛАРИНИ БАҲОЛАШ

Ҳозирги кунда ер юзида содир бўлаётган иқлим ўзгариши, ҳаво ҳароратининг кўтарилиши ва қурғоқчиликнинг юзага келаётгани Ўзбекистон Республикасининг жанубий вилоятларида етиштирилаётган буғдойнинг (Triticum aestivum L.) дон сифатига салбий таъсир кўрсатмоқда. Ушбу муаммони ҳал этиш мақсадида юмшоқ буғдойнинг дурагайлаш йўли билан яратилган маҳаллий 23 та тизмалари дон сифат кўрсаткичлари андоза Гром ва Ғозғон навларига таққослаб ўрганилди. Юмшоқ буғдой тизмаларини назорат кўчатзорида экиб ўрганишдан асосий мақсад янги юмшоқ буғдой навларини яратиш билан бирга суғориладиган майдонларга мослашган, ҳосилдор, дон сифат кўрсаткичлари юқори бўлган тизмаларни ажратиб олиш ва агроэкологик нав синаш, рақобатли нав синаш кўчатзорларига ўтказишдан иборат. Танлаб олинган андоза навлар жорий йилда жанубий вилоятларда энг катта майдонга экилган. Тажрибада нав ва тизмалар 3 та қайтариқда жойлаштирилди ҳамда маълумотлар статистик таҳлил қилинди. Нав ва тизмаларнинг дон сифат кўрсаткичларидан оқсил миқдори, клейковина миқдори, клейковина кучланиш ўлчагич (ИДК) кўрсаткичи, дон шишасимонлиги каби муҳим кўрсаткичларига баҳо берилди. Генетик жиҳатдан дон сифати юқори бўлган тизмалар танлаб олинди ҳамда кейинги босқичга ўтказилди.