ПАХТА ТОЗАЛАШ ҚУРИЛМАСИНИНГ САМАРАЛИ ИШЛАШИНИ ТАЪМИНЛОВЧИ ОПТИМАЛ ПАРАМЕТРЛАРНИ АНИҚЛАШ

Ҳар бир технологик машиналарни лойиҳалаш ва ишлаб чиқаришга жорий қилишдан аввал уларнинг рационал параметрларини аниқлаш алоҳида аҳамият касб этади. Чунки лойиҳаланаётган янги машина ўзидан олдинги ва кейинги жараёндаги машиналарга мутаносиб бўлиши зарур. Худди шундай ишлаб чиқариш соҳаларидан бири пахтани дастлабки ишлаш бўлиб, ушбу соҳада ҳам бир нечта кетма-кетликда жойлашган технологик машиналардан фойдаланилади. Уларнинг юқори самарадорлик ва унумдорликда ишлаши рационал параметрларга эга бўлган ишчи органларига боғлиқдир. Тадқиқотчилар томонидан соҳага жорий қилинаётган пахта тозалаш машиналарининг самарали ишлашини таъминловчи параметрларни аниқлаш ҳамда белгиланган тартибда тажрибалар ўтказиш долзарб муаммолардан бири ҳисобланади. Мақолада пахта тозалаш корхоналарида пахта хомашёсини йирик ва майда минерал аралашмалардан тозалашда фойдаланиб келинаётган технологик машиналарнинг ишлаши мобайнида ишчи элементларининг қурилма тозалаш самарадорлигига таъсири ўрганилиб, қурилма ишчи элементлари турли хил қийматларда кирувчи омил сифатида танлаб олинган. Қурилма ишчи элементларининг оптимал параметрларини аниқлаш мақсадида такрорланмас комбинациялашган усулда ўтказилган тажрибалар натижалари келтирилган. Ушбу параметрларни аниқлашда ТОТ 23 кўринишдаги тўлиқ факторли эксперимент ўтказиш орқали қурилма ишчи органларининг рационал параметрлари аниқланган. Олинган натижалар Фишер F-критериясининг 5 % аҳамиятлилик даражасидаги жадвал асосида солиштириб текширилган.